الاثنين، 1 سبتمبر 2008

الدرس الاطالي, وقتاش فرنسا تستوعبه؟

أني من قبل نحب ايطاليا, ديما نشجعها في الكرة, نحسهم كيفنا عندهم اللف و الدوران تخديم المخ و التمقعير متاعنا! زيد عندي صحابي طلاين عسل الدنيا! لكن اليوم وليت انموت على اطاليا و كبرت في عيني موش بالمقرونة موش بالكرة و موش بالفراري! أما بالاحساس بالمسؤولية و بالنظر بكل موضوعية للتاريخ و قبول الاخطاء اللي قاموا بها.
علاش؟ على خاطر برلوسكوني اليوم مشى الى ليبيا و طلب الاعتذار من ليبيا عللي عملته فيهم اطاليا في الحقبة الاستعمارية!
معا انها الخطوة هذه تعتبر مهمة جدا هي أقل ما تنجم تعمله باش ترجع المياه لمجاريها و باش تنجم تقوم علاقة خالية من الكره من العقد و من مخلفات الاستعمار.
و السؤال هنا هو : وقتاش تقوم فرنسا بخطوة مماثلة؟

الارواح الي قتلتهم فرنسا, المسار الاصلاحي الي كان قايم وقتها و دمرته فرنسا ما يستحقش كلمة سامحني؟
العقد النفسية الي خلفهم الاستعمار الفرانساوي و اللي مازلنا نقاسيو فيه ما يستحقوش كليمة سامحني؟ (ومن غير ما نحكيوا على الي عملتو في الجزائر من مئات الألاف أو الملايين الموتى و من تجارب نووية فوق ارضها و على فكرة فرنسا خلات زادة اسرائيل تعمل تجارب نووية في الجزائر)
علاش؟ الفرانساوي بشر زايد مرتبة علينا؟
اش قالت فرنسا وقتلي قالولها قول سامحني؟ حبت تعمل قانون يمجد الاستعمار!!
من بعد تجي تقوللنا اللي هي بلاد حقوق الانسان!
زايد و برة!